Widgetized Section

Go to Admin » Appearance » Widgets » and move Gabfire Widget: Social into that MastheadOverlay zone

Hargeysa: Marwada Koowaad Iyo Masuuliyiin Door Ah Oo Ka Qayb-galay Furitaanka Qayb Ka Mid Ah Cisbitaalka Carruurta Ee Maxamed Aaden Sheekh (Sawiro)

Marwada Madaxwaynaha Somaliland Marwo Aamina Xaaji Maxamed Jirde (Aamina-weris) ayaa ka qayb-galay Munaasibad xadhiga lagaga jaray qayb ka mid ah dhismaha Cisbitaalka Carruurta ee ay Hargeysa ka hirgaliyeen qoyska Maxamed Aaden Sheekh oo Cisbitaalkaasi loogu Magac daray.

Cisbitaalkan oo noqon doona mid u gaar ah Carruurta isla-markaana qayb ka mid ah lagu bixin doono tababarada caafimaadka, ayaa waxa furitaanka ka qayb-galay Masuuliyiin ay ka mid yihiin Guddoomiyaha Golaha Wakiilada Cabdiraxmaan Maxamed Cabdilaahi (Cirro), Wasiirrada Caafimaadka iyo qorshaynta iyo dhakhaatiir badan.

Munaasibadan ayaa sidoo kale waxa ka qayb-galay saraakiil ka socotay hay’addaha caafimaadka ee Somaliland ka shaqeeya, kuwaasi oo soo dhaweeyay cisbitaalka Maxamed Aaden Sheekh, kaasi oo laga hirgaliyey halkii uu hore u ahaan jiray Cisbitaalkii Jajabka ee Magaalada Hargeysa, oo sanadkii hore laga raray qoysas danyar ahaa.

Marwada Koowaad oo halkaasi ka hadashay ayaa sheegtay inay ku faraxsan tahay inay ka qayb-gasho furitaanka qaybta maanta la furay, iyadda oo sheegtay in cisbitaalkani wax badan oo loo baahnaa dabooli doono, waxay u mahadnaqday qoyska Maxamed Aaden Sheekh oo ka hor intii aanu geeriyoon ku sii dardaarmay in cisbitaalkan laga dhiso Somaliland, gaar ahaan Magaalada Hargeysa, kaasi oo dhismihiisu socdo, isla-markaana qaybtii koowaad maanta la furay.

Wasiirka Wasaarada Caafimaadka Somaliland Dr Xuseen Maxamed Muxumed (Xoog) oo isna halkaasi ka hadlay ayaa sheegay in wasaarad ahaan ay ka go’an tahay inay dhamaystiraan guud ahaan agabyada cisbitaalku u baahan yahay marka la dhamaystiro, isla-markaana horeba u diyaariyeen shaqaalihii ka hawlgali lahaa.

Guddoomiyaha Golaha Wakiilada, Wasiirka qorshaynta Qaranka iyo masuuliyiintii kale ee halkaasi ka hadlaya ayaa iyaguna mahadnaq iyo duco u diray Maxamed Aaden Sheekh.

Dhakhaatiir ka socday dalka Talyaaniga oo iyaguna halkaasi ka hadlay ayaa sheegay inay hiil iyo hooba la garab taagan yihiin cisbitaalkan oo maanta qaybtiisa Carruurta xadhiga laga jaray.